San Juan Naoa

Hamabi urteko lanaren ondoren, Albaolako Itsas Faktorian eraikitako San Juan baleontziaren erreplika prest dago urarekin lehen aldiz bat egiteko. Ontzia Pasaian eraiki zen XVI. mendean, eta bertan berreraiki dute orain, jatorrizkoaren omenez. Datorren azaroaren 7an, itsasoratzea egingo da: nazioarteko garrantzia duen une historikoa, gure itsas ondarearen balioa azpimarratuko duena.
Jatorrizko nao Red Bayn (Kanada) hondoratu zen 1565ean, eta haren aztarnak aurkitzeak gure historia itsasozalean mugarri bat ezarri zuen.